Kaixo berriz ere!
Oraingo honetan ekitaldi eta data interesgarri batzuen berri ematera gatoz.
Egun honek, gizateriaren adierazpenaren, identitatearen eta hizkuntzalaritzaren forma preziatuenetako bat oroitzen du. Historian zehar kultura eta kontinente guztietan erabilia izan den poesiak, gure gizatasun komunaz eta gure balio partekatuez hitz egiten du, poemarik sinpleena elkarrizketaren eta bakearen katalizatzaile boteretsu bihurtuz. Beste hitz batzuetan esanda, elkarrizketen aniztasunaren agerpena da; hitza erabiliz, ideien hedapen askearen agerpena, sormenaren eta berrikuntzaren presentziarekin batera. Mota anitzetako sormenerako lagungarria izan ohi da, hitzak erabiltzeko modua eta errealitatea jasotzeko eta interpretatzeko dugun modua era berritzaile batean egiten delako. Hizkera poetikoak, hortaz, metafora, elkarketa eta gramatika bereziak direla eta, kulturen arteko elkarrizketarako aukera ematen du (UNESCO, 2020).
Poesiaren Eguna dela eta, mezu hau helarazi zigun Audrey Azoulayk (2020), UNESCOko zuzendari orokorrak:
"La poesía anida en lo más hondo de lo que somos, mujeres y hombres que conviven en el mundo de hoy, abrevándose en el legado de las generaciones pasadas y custodiando este mundo para nuestros hijos y nietos. Al celebrar hoy la poesía, celebramos nuestra capacidad de luchar unidos por la diversidad biológica como “preocupación común de la humanidad” y como parte integral del proceso dedesarrollo internacional."
1999ko egun hartatik, mundu guztiko lurraldeetan antolatzen dira urtero poesia oinarritzat duten ekitaldiak. Hauen bitartez, olerkigintzaren irakurketa, idazketa eta argitalpena sustatzen da. Gainera, poetei omenaldia egiteko, ahozko tradizioak berpizteko, poesia eta beste arte batzuen (antzerkia, dantza, musika…) arteko konbergentzia sustatzeko eta hedabideetan poesiaren ikusgarritasuna areagotzeko aukera paregabea da.
Gauzak horrela, Euskal Herrian ere Poesiaren Egunak bere lekua hartzen du eta hainbat ekitaldi burutzen dira egun hau ospatzeko. Esate baterako, bihar hasi eta ostirala bitartean, Donostian Poesiaren Astea, Poesialdia, egingo dute Donostia Kulturako hainbat gunetan. Hauek dira burutuko diren ekintzetako batzuk:
- 22 astelehena: Itxaro Bordak (Iratxe Retolazaren laguntzarekin) bere obra poetikoaren gako nagusiak azalduko ditu eta, aldi berean, zenbait poemaren irakurraldia eskainiko du (Ernest Lluch kultur etxean).
- 23 asteartea: Bigara bikote sortzaileko kideek Ulu, ala, ele, Abere ba ikuskizun poetikoa aurkeztuko dute (Viktoria Eugeniako Club Aretoan).
- 24 asteazkena: Luis Garcia Montero poeta, idazle, kritikari eta irakaslea Itziar Minguez poetarekin solasean arituko da, bere obra eta ibilbidearen inguruan (Ernest Lluch kultur etxean).
Poesia hilda dago baina ez dut nik hil.
Ene hatz mamien markak aurkituko dituzue igual
gorpuaren gainean,
ni badaezpadan inguratu naiz, hilotza
oraindik hil gabe zegoelakoan.
Eskuak gainean harrapatu nauzue baina
berbizitzen entseiatu nintzelako.
Ni heldu naizenerako ez zuen iada konorterik
azken hatsetan zegoen.
Batzuetan ene oinetara etortzen zen jolastera.
Nik ez nuen poeta izan nahi.
Nork esan dizue ikusi ninduela? Ni hemendik
paseatzen nenbilen.
Ez dakit nork hil duen, hurreratu naizenean
jendez inguratuta zegoen, hila.
Poeta omen direnetako poeta batek itoko zuen akaso.
Ez nazazue preso hartu, ni ez naiz izan,
eta ez zaizkit gartzelak gustatzen.
Zelan ehortziko duzue, gainera, poesia ez da
gereziondo ataut horretan kabitzen,
ekar itzazue egunkari batzu gutienez
tapatzeko…
Poesia hilda dago baina, zin dagizuet, ez dut nik hil.
J. Sarrionandia
iruzkinik ez:
Argitaratu iruzkina