EUSKARALDIA: "GEHIAGO, GEHIAGOREKIN, GEHIAGOTAN"

    Berriz ere martxan jarriko da Euskaraldia, gizartearen gune guztietan hizkuntza ohiturak aldatzeko ariketa soziala. Euskaraldiaren helburu nagusia herritarren hizkuntza ohiturak aldatuta euskararen erabilera handitzea da. 2018an, 11 egun iraun zituen ariketa sozial honek; aurten, berriz, 15 egunekoa izango da, azaroaren 20tik abenduaren 4ra artekoa. Gainera aurten, norbanako bezala (ahobizi edo belarriprest izanez) parte hartzeko aukeraz gain, taldean parte hartzeko aukera ere izango da (arigune-en bidez). 

    Ahobizi izatea aukeratzen duen pertsonak, euskaraz ulertzen duten guztiekin euskaraz egingo du. Besteak euskaraz ulertzen duen ez dakienean, lehen hitza beti euskaraz izango da; eta pertsona horrek euskaraz ulertzen badu, euskaraz jarraituko dugu. Hau da, gakoa edo helburua ahal den guztietan euskaraz egitea da. 

    Belarriprest-ak, aldiz, ulertzen duten guztiekin uneoro euskaraz hitz egingo ez dutenak dira. Gutxienekoa euskara ulertzea da. Hala ere, nahi eta ahal beste egin dezake euskaraz; baina besteek euskaraz egin diezaioten eskatuko du. Garrantzia jokaerari emango zago eta ez gaitasunari. 

    Azkenik, aurten txertatutako ariguneak ditugu. Hauek, euskaraz lasai aritzeko guneak dira eta euskaraz hitz egiteko aukera bermatzen dute uneoro, izan entitate barruan (barne ariguneak) edo izan entitateak herritarrekin duen harremanean (kanpo ariguneak). 

    Gure iritziz, lehenagoko zenbait sarreretan esan bezala, garrantzitsua da euskara baloratzea eta erabilpenari bultzada ematea. Euskaraldia bezalako egitasmoak egokiak iruditzen zaizkigu eta horregatik, parte hartzera gonbidatzen zaituztegu! 

    Azkenik, Idoia Trenorren, Bertsozale elkarteko koordinatzailearen, hitzak partekatzen ditugu; euskaraldiarekin lotutako, eta euskararen erabilpenaren inguruko hausnarketa politta iruditu zaigulako, eta haren hitzekin bat egiten dugulako. 

"IRAKURRI, GOZATU ETA OPARITU" EGITASMOA

    Berriako artikuluan esaten denez, hamar euskaldunetik lauk zailtasunak dituzte euskaraz irakurtzeko eta hori aldatzeko asmotan, "irakurri, gozatu eta oparitu" egitasmoaren hamalaugarren edizioa abian da dagoeneko. 

    Egitasmo honetan, Hego Euskal Herriko hamaika udalerrietako liburutegiek hartzen dute parte eta lehen pausoa, horietako liburutegi batean euskarazko liburu bat mailegatu eta irakurtzea da. Ondoren, liburua gustukoa izan bada, erabiltzaileak fitxa bat bete dezake liburutegian; fitxa horretan, liburua nori gomendatuko liokeen adierazi behar du parte hartzaileak, eta pertsona horrentzako mezu bat ere idatzi beharko du. Prozesu hori burutzen duten pertsonak, aukeratutako liburu horren zozketan sartuko dira; eta, irabaziz gero, liburu hori jasoko dute (fitxan idatzitako mezuarekin batera), gomendatu nahi zion pertsona horri oparitu ahal izateko. Gainera, aurten bigarren pizgarri bat ere eskaini nahi izan dute: liburuez gain, irakurgailu elektronikoak ere zozketatzea. 

    Vanesa Gutierrez Maguregi Euskaltzaleen Topaguneko kideak azaltzen duen moduan, lehen plano indibidualistagoan mugitzen zen egitasmoa, baina aurten horrekin apurtu nahi izan dute eta "oparitu" hitza azpimarratu nahi izan dute. Horrekin, irakurketa partekatua nabarmendu nahi izan dute eta elkarrekin irakurtzerakoan sortzen diren emozio horiei indarra eman nahi izan diete.

    Azkenik, Vanesa Gutierrezen hitz hauekin amaitu nahiko genuke gaurko sarreratxo hau: "Esan dezakegu emozioetatik datorren denak laguntzan gaituela besteen zapatetan jartzen. Horrela lortzen badugu irakurzaletasuna piztea, ba, aurrera". Egitasmoa bera, eta aurten liburuak gomendatu eta oparitzeari emandako garrantzia, oso ekintza polita iruditu zaigu. Izan ere, ohartu gara guk ere askotan errazago irakurtzen ditugula zenbait liburu oparituak direnak; hau da, gure kabuz agian ez genuela liburu horrekin topo egingo, edota irakurtzeko denbora hartuko, baina inguruko pertsona batek oparitzen digunean, beti irakurtzen ditugula. Hori dela eta, euskarazko liburuak gehiago ezagutu eta irakurtzeko egitasmo egokia dela pentsatzen dugu, nahiz eta Covid-19ak eragindako egoera honetan, agian, aurrera eramateko zailtasunak egon daitezkeen.